රට නෙල්ලි

නෙල්ලි ගැන නම් හැමෝම දන්නවා.. කන්න කාගෙන්වත් තහනමකුත් නැහැ, ඒත් කුඩා දරුවන්ට නම් කවා ගන්න එක පහසු වැඩකුත් නෙමෙයි. ඒ එහි ඇති තිත්ත සහ කහට රසය අන් සියල්ලටම වඩා ඉස්මතු වන නිසා..

මේ අතරේ වැඩි වටිනාකමක් නැති තවත් නෙල්ලි වර්ගයක් තියෙනවා..පුංචි කාලේ ගිය පාසල ළඟ තිබුණු පින් වත්තේ මේ ගෙඩි පිරුණු නෙල්ලි ගහක් තිබුනත් අන් පලතුරු වර්ග වගේ මේ කුඩා නෙල්ලි ගෙඩිය කන්න බොහෝ දරුවන්ට ගෙවල් වලින් අවසර තිබුනේ නැහැ..

හේතු කීපයක් නිසා..

පළමුවැන්න අතු ශක්තිමත් නැති මේ ගහේ නැග්ගොත් අත්තත් එක්කම බිමට කඩන් වැටීම අනිවාර්ය නිසා..

දෙවැන්න උෂ්ණාධික බව අධික පළතුරක් ලෙස සමාජ සම්මත වී තිබීම නිසා....

මොන තරම් තහංචි තිබුනත් කුඩා අපි රංචුවෙන් සඟවන්නට බැරි වුනු, රස මතක් වන විට අදටත් කටට කෙල උනන ''රට නෙල්ලි'' ගැනයි අද මේ සාකච්චාව..

රට නෙල්ලි ඌශ්නාධික බවට සමාජ සම්මත වුනේ කොහොමද? මේ ගැන හිතා ගන්න පහසුම විධිය මේ කුඩා පලතුරේ ඇති පෝෂක සංයුක්තිය සොයා බැලීමයි. 

රට නෙල්ලි ග්‍රෑම් 100ක් ගතහොත් ඉන් 91.7ක්ම ජලය. ඉතිරි කොටසේ අඩංගු වන්නේ කැල්සියම්, පොස්පරස්, යකඩ වැනි ලවන වර්ග සහ විටමින් වර්ග. මේ අතර විටමින් සි තමා බහුලවම පවතින්නේ.. 

විටමින් සි වැඩිපුර ශරීරයට ඇති වූ විට ශරීරයේ  ධූලක වර්ග සහ වැඩිපුර ඇති ලෝහ සෝදා හැරීමක් සිදු වෙනවා. ඇසේ කබ  ලෙස පසු දින උදෑසන  අපට පෙනෙන්නේ ශරීරයෙන් පිට කෙරෙන මේ ධූලක වර්ගයි.. රට නෙල්ලි වලට ඌශ්නාධික බව පට බැඳුනේ මේ නිසයි.

ආයුර්වේදයේදී  සම රැලි වැටීම වලක්වා වයසට යාමේ ලකුණු ප්‍රමාධ කිරීමට පලයද, ආහාර මාර්ගය පිරිසිඳු කර ආහාර මාර්ගයේ රෝග ප්‍රතිකාර පිණිස ඇටයද භාවිතා කරනවා. 

මිට අමතරව දහදිය ග්‍රන්ථි විවර කර සමේ ස්වසනය පහසු කර සම පිරිසිදු කිරීම සහ එමගින්ම සර්වාංගය පිරිසිඳු කිරීමටත්, ස්ලේෂ්මල පටල වල ශ්‍රාවය පවත්වා ගැනීම තුලින් ස්වසන පද්ධතිය පිරිසිඳුව පවත්වා ගැනීමට කොළ යුෂ භාවිතා කෙරෙනවා.. 

ඒ අනුව බලන විට රට නෙල්ලි සිරුරේ අභ්‍යන්තර සෝදා හැරීමක් කර පිරිසිඳු කිරීමට හැකියාව ඇති ඉතා ගුනැති පළතුරක් නොවේද?

දේශීය වෙදකමේදී මේ අගනා ශාකයේ කොටස් වේදනා නාශක පිළියෙළ කිරීමටත්, සන්ධි ප්‍රදාහ, ස්වසන ආබාධ, දියවැඩියාව, ගොනෝරියාව, සමේ රෝග, කල් පවතින කැස්ස සහ තුවාල සුවයට භාවිතා කරනවා. 

සමේ ඇතිවන දද සහ ඒ නිසා ඇතිවන අධික කැසීමට රට නෙල්ලි කොළ යුෂ සහ පලතුර යන දෙකම එකසේ වටිනා ප්‍රතිකාර . රට නෙල්ලි වඩාත්ම ජනප්‍රියව තිබුනේ සර්ප විෂ වෙද මහතුන් අතරයි. ඒ පොලොන් විසට ප්‍රතිකාර කිරීමේදී රට නෙල්ලි ශාකයේ කොටස් ඔවුන්ට නැතිවම බැරි නිසයි.

අප රටේදී වැඩි වටිනාකමක් නොලැබෙන මේ අගනා ශාකය  බටහිර ලෝකයට පෙනෙන්නේ මිනිස් ප්‍රජාවේ අනාගතය සුරකින දෙව්ලොවෙන් ආ ශාකයක් ලෙසයි. 

ඔවුන්ගේ පර්යේෂණ දත්ත වලට අනුව අදටත් බටහිර ලෝකයට ප්‍රතිකාරයක් නොමැති පෙනහළු වලට බලපාන   cystic fibrosis රෝගයේදී පෙනහළු ආරක්ෂා කර දීමේ හැකියාව රට නෙල්ලි ශාකයේ කොළ සහ පලයට තිබෙනවා.

විටමින් වර්ග වල අධික කම නිසා ප්‍රති ඔක්සිකරණ හැකියාව වැඩිවීම තුලින් ආසාධන වලට ඔරොත්තු දීමත්, පිළිකා වැළක්වීමේ හැකියාවත් ඇති බව ඔවුන් පර්යේෂණ වලින් ඔප්පු කර පෙන්වනවා. 

ඔවුන් කල තවත් පර්යේෂණයකදී  පරපෝෂිත ආසාධන වලට විරෝධිභාවය, විශේෂයෙන්ම පටි පනුවන් විනාශ කිරීමේ හැකියාවක් මේ කුඩා නෙල්ලි ගෙඩියට ඇතැයි පෙන්වා දී තිබෙනවා.  

ශාකයේ විවිධ කොටස් විවධ පර්යේෂණ වලට ලක් කල ඔවුන් තව දුරටත් පවසන්නේ රට නෙල්ලි ගෙඩියේත්, කොලයේත් ශරීරයේ ඇති වැඩි පුර ජලය ඉවත් කිරීමේ හැකියාව නිසා (Diuretic) ඉදිමුව ඇති රෝගීන්ට ප්‍රතිකාර පිණිස අනාගතයේ මේ ශාකයේ කොටස් උපයෝගී කර ගනිමින් ඖෂධ නිපදවිය හැකි බවයි..

ප්‍රති ජිවක ප්‍රතිරෝධී තාවය නමැති භයානක සෞක්‍ය ගැටලුව ඉදිරියේ සිටින අනාගත පරපුරේ ගැලවුම් කරුවා ලෙස බටහිර ලෝකයට පෙනෙන මේ රසවත් පලතුර අපේ දරුවන්ගෙන් ඌශ්නාධික යයි කියා ඉවතට දැමීමට තරම් අප තව දුරටත් අනුවන විය යුතුද?

හෙට අනිද්දා රට නෙල්ලි ගෙඩියෙන් නිපදවෙන පෙත්ත ඔබ නොදැනම  ගිනි ගණන් වලට ෆාමසියෙන් මිලට ගැනීමට සිදු වනු නොඅනුමානයි.  

ඉන් පෙර  දරුවන්ට ඇති සේ රස විඳින්න රට නෙල්ලි ගෙවත්තේ රැක ගැනීමට අදම ඔබේ අවධානය යොමු කරන්න...

රේණුකා විමලරත්න: ලන්ඩනයේ සිට

චායාරූප අන්තර්ජාලයෙන්.