Thursday 30 June 2016

රේණුකාගේ පලා මල්ල 4: එරබඳූ

              එරබදු මල් මොට්ටු මොට්ටු
                 අවුරුද්දත් කිට්ටු කිට්ටු 


                                 

මගේ මේ පලා මල්ලත් හැබෑටම ඉතින් පිස්සාගේ එකට වඩා වැඩි වෙනසක් නැහැ නොවැ. මේක ඇතුලේ පලා විතරක් නොවෙයි තුනපහ, ගඩාගෙඩි, එළවලු, දේශපාලනේ, ජාති ආලේ අරක මේක ඔක්කොම තියෙන බව ඉතින් මේ වෙන  කොට කවුරු කවුරුත් දන්නවනේ. ඉතින් අද පලා මල්ලට අත දැම්ම ගමන් අහුවුණේ ජාත්යන්තර කුමන්ත්රණයක් :) 

ඕන්  දැන් අහන්න එපා ජාත්යන්තර කුමන්ත්රණය කියන්නේ මොකක්ද  කියලා. ඇයි හත්වලාමේ ඔය ඉරාන-ඉරාක, ඇෆ්ගනිස්තාන, සිරියා , රනිල්-මහින්ද වගේ මෙකි නොකී යුද්ධ වලට   ඇමෙරිකාව- එංගලන්තේ කියන රටවල් දෙක පස්සෙන් ඉඳගෙන ගිනි අවුලන එකටනේ ඔය නම දෙන්නේ. එත් ඉතින් පලා වර්ගයක් කොහොමද ජාත්යන්තර කුමන්ත්රණයකට අහුවුනේ..?????


සිංහල අවුරුදු කියල එකක් ආවනේ ආයුබෝවන්ඩ මේ  ඊයේ පෙරේදා. ඕන් ඉතින් ඕකට ගම රට බලා යන්න මහා ලොකු කඩි  කුලප්පුවක් අපේ කට්ටියට  තිබ්බ ( කියන්නේ මාත් ඇතුළුව). අවුරුදු දහසයකින් සිංහල අවුරුදු  කාලෙක අපේ කට්ටිය ලංකාවට පාත් වෙලා තිබුනේ නැති නිසා තමයි මේ කලබලේ තිබ්බේ. දැන් ඉතින් ගෙදර මහ කතන්දර ගොඩයි..රබන් පද වැයෙන හැටි, ඔන්චිල්ලා, රතුපාටට වැටේ වැනෙන එරබදු මල්, කොහාගේ සංගීතේ, කැවුම් සුවඳ අරකමේක කන් අඩි පැලෙන්න සාකච්චා.


 ඕන් ඉතින් සිරි ලංකාවට ගොඩ බැස්සට පස්සේ තමයි ඔය පුම්බන් හිටපු  බැලුම් බෝලේ ඩෝන් ගාල පිපිරුවේ.. කෝ යකෝ එරබදු???? එහෙත් බැලුවා -මෙහෙත් බැලුවා කොහෙත් එරබදු නැහැ බෙහෙතකටවත්.. බෙහෙත් කිව්වම ...දෙයියන්ටම ඔප්පු වෙච්චාවේ..එරබදු වල තියෙන බෙහෙත් ගුණ නිසා දෙකක් නැහැ ඇමෙරිකාව එරබදු උස්සලා ඇති. ඕන් ඔහොමයි පලා මල්ලේ තිබිලා ජාත්යන්තර කුමන්ත්රණයක් සොයා  ගත්තේ හොදේ.




අපි පුංචි කාලේ නම් අවුරුදු එන වග අපට මුලින්ම කිවේ මේ එරබදු මල් පොහොට්ටුයි. මාර්තු මාසේ මැද විතර පොහොට්ටු එන්න පටන් ගන්න එරබදු අප්‍රියෙල් මාසේ පටන් ගන්න විට මුළු රටම රතු පලසකින් වසා ගන්නවා. බලන බලන හැම තැනකම වැටට, හේනේ කුඹුරේ වගාවන් වටා රටාවකට තමා එරබදු වවා තිබුනේ. වැටට හිටවූ එරබදු ගස්වලට බුලත්, ගම්මිරිස්, අඟුණ, මෑ දඹල වැලක් දෙකක් වවා ගැනීම හැම ගෙවත්තේම සිදු වුනා. විශේෂයෙන්ම කුඹුරු සහ ඕවිටි වටා වැඩිය උස නොයන්න කප්පාදු කල එරබදු වැටක් වැරදුනේම නැහැ.


පණු අමාරු වලට අත්තම්මා පෙති ගිල්ලෙව්වේ නැති බවත් බොහෝ එළවලු ඒ වෙනුවට යොදාගත් හැටිත් මගේ ලිපි වල නැවත නැවත විස්තර කර තිබෙනවානේ. ඕන් පණු ගායට නොවරදවා හැදුනු අත් බෙහෙත් වලින් තවත් එකක්  තමා මේ එරබදු දල්ල. රසවත් පලා වර්ගයක් වුනු එරබදු නිසි ලෙස පිස ගන්න එදා අම්මලා හොදින් දැන  සිටියා. දල්ලේ ඇති තිත්ත රසය යන්නට මද උණුසුම් වතුරේ විනාඩි 5ක් පමණ පොඟවා මිරිකාගෙන රතු ළූණු උම්බලකඩ මිටි කිරි දමා පිසින එරබදු ව්‍යංජනය අතිශයින්ම රසවත්.



 පටි පණුවන් ආසාධනයට බෙහෙවින් හිතකර එරබදු පණු අමාරු වලට පමණක්ම  නොවෙයි කැස්ස, ඇදුම සහ හතිය, සන්ධි වේදනා, වෙනත් උදර වේදනා, ශරීරයේ කොතැනක හෝ සෑදෙන විසප්පු ගෙඩි, හිසරදය, කම්මැලි බව නැති කරන්නට හැකි අසහාය ඖෂධයක් ලෙසිනුයි අත්තම්මා හැඳින්වූවේ.


දේශීය වෙදකමේ සහ ආයුර්වේදයේ එරබදු කොළ, පොතු, මුල් සහ ඇට යනාදී සියලු කොටස් සියල්ලම බෙහෙතට යොදා ගත්තා. දුඹුරු පාට බෝංචි ඇටයක හැඩති  මේ ඇට පොඩිකාලේ අපි එකතු කල මදටිය, ඔලිඳ සමඟ තිබු තවත් ඇට වර්ගයක්. මේ ඇටයක් දෙකක් ගිලුනොත් ''ගංජා ගැහුවා වගේ'' කියලා කියනවා මට මතකයි.

 සිංහල බෙහෙතේදී එරබදු කොළ උදරයේ පණු ආසාදන, කන් වේදනා වලට ප්‍රතිකාර පිණිස බහුලව  භාවිතා කළා. එරබදු ගහේ  කොළ පොතු ඇට සියල්ල එක්කර සන්ධි ප්‍රධාහ වලට පත්තු සෑදීම කෙරුණු අතර සමේ සහ ඇස් රෝග, පිරිමින්ගේ ලිංගික අප්‍රාණිකත්වය, ආහාර දිරවීමේ ගැටළු, මල බද්ධය, පිළිකා සහ ශරීර අභ්‍යන්තරයේ ඇතිවන විෂ ගෙඩි  වැනි තවත් බොහෝ රෝග වලට ප්‍රතිකාර පිණිස යොදා ගැනුනා.


අයුර්වේදයේදී එරබදු රුධිරය පිරිසිඳු කිරීම,වේදනා නාශකයක් ලෙස, අපස්මාරයට, ඔසප් ක්‍රමවත්ව පවත්වා ගැනීම, උණ අඩු කිරීම, කැස්ස සහ හතිය,ගෙඩි  පිළිකා, කොන්ද ආශ්‍රිත සහ සන්ධි  වේදනා , නින්ද නොයෑම , මුත්‍රා ආසාධන වැනි සියක් රෝග වලට ප්‍රතිකාර වශයෙන් යොදාගෙන තිබෙනවා.

මෙතරම් ගුණදායි එදිනෙදා ජිවිතයට ප්‍රයෝජනවත් එරබදු අපට නොදැනී අතුරුදහන් වුයේ කොහොමද? එරබදු අතුරුදහන් කළා විය නොහැකිද? ජාත්‍යන්තර කුමන්ත්‍රණය පලා මල්ලට සේන්දු වෙන්නේ මෙන්න මෙතනදියි.

කලිනුත් සඳහන් කළා සේ අපේ කාලේ එරබදු බහුලව වවා තිබුණේ කුඹුරේ ඕවිටේ වැට මායිමට වෙන්න. රසායනාගාර වල පරීක්ෂණ නොකලට ගහ කොළ පස ගැන මනා අවබෝධයක් තිබු අපේ ගොවින් දැන සිටියා එරබදු ගහෙන් පසට ලැබෙන ස්වභාවික සාරවත් බව. එරබදු ගසේ මුලින් පසට එක්වන ස්වභාවික නයිට්‍රිජන් නිසා රසායනික පොහොර නොයොදා පලදාව බහුලව  ලැබුනා.

 දෙවැන්න එරබදු ගගේ කටු නිසා ඉඳි වැට බිඳගෙන එන ගෝන මුව හරක් එළු වැනි ආපදා වලින් වගාව රැකුණා. තුන්වැන්න එරබදු කොළ වල ඇති තිත්ත රස නිසා කෘමී ආකර්ශනයක් සිදු වන්නේ නැහැ. එය ස්වභාවික කෘමි නාශක වර්ගයක් ලෙස ක්‍රියාත්මක වීම නිසා විස අඩංගු කෘත්‍රිම කෘමි නාශක අවශ්‍ය නැහැ. ඉතින් එරබදු ගස් තිබුනොත් කොහොමද බටහිර අපිට මේ වස විස විකුන්නන්නේ? 


කුමන්ත්‍රණයේ අවාසනාවන්තම කොටසට  එන්නේ දැනුයි. බටහිර  රසායනාගාර පර්යේෂකයන් පවසන පරිදි අනාගත වෛද්‍ය විද්‍යාවේ ජයිව ඉන්ධනය (bio-fuel) වන්නේ එරබදු ඇටය ඇතුළු ශාකයේ සියලුම කොටස්.


නූතන වෛද්‍ය ලෝකය මුහුණ දී ඇති විශාලම ගැටලුව වන ''ප්‍රතිජීවක අසන්වේදිතාවය'' (antibiotic ressistance) සඳහා මේ වන විට ලැබී ඇති ලඟම  එන  පිළියම විය හැක්කේ එරබදු ශාකයයි. ඔවුන්ගේ පර්යේෂණ ප්‍රතිපල වලට අනුව ''සුපර් බග්' (super bug) ලෙස හඳුන්වන මෙතිසිලින් රෙසිස්ටන්ට් පෙනිසිලින් (Methicillin Resisstant Staphilococcus Aurius) (M R S A) විනාශ කල හැකි erycristagallin and orientanol B විශාල සාන්ද්‍රණයකින් එරබදු නිස්සරණයේ අඩංගු වෙනවා. ඉතින් එරබදු අපේ රටවල තිබිලා කොහොමද? පෙත්තක් හදලා අපිට විකුනන්න එරබදු අපෙන් විනාශ කරන්නම එපෑය.


මිට අමතරව මේ රසායානාගාර පර්යේෂණ දත්ත වලට අනුව ඔප්පු කර ඇති එරබදු ගුණ මේ විධියට වර්ග කල හැකි බවයි ඔවුන් පවසන්නේ;

  • ·       anti-osteoporosis  ඔසප් නැවතුනු කාන්තාවන්ගේ අස්ථි වල සිදුවන වෙනස්කම් වැලකීම
  • ·       මුඛ කුහරයේ පිළිකා කාරක බැක්ටීරියා විනාශ කර මුක සෞක්‍යය ආරක්ෂා කිරීම
  • ·       මධ්‍යම ස්නායු  පද්ධතියට බලපා වලිප්පුව වැලැක්වීම -anti convulsion effect
  • ·       anti -coagulation effect රුධිරය තුනී කිරීමෙන් ගැඹුරු ශිරා සහ පෙනහළු වල රුධිර කැටි ඇතිවීම වැලැක්වීම
  • ·       anti -microbial effect බැක්ටීරියා සහ වයිරස වලට විරුද්ධව සටන් කිරීමේ හැකියාව
  • ·       cytotoxicity effect පිළිකා ශයිල නැසීමේ හැකියාව
  • ·       වසා පද්ධතිය පිරිසිඳු කිරීම
  • ·       කොලෙස්ටෙරෝල් අඩු කිරීම
  • ·       රුධිර සිනි මට්ටම අඩු කිරීම 
 (http://www.stuartxchange.org/Dapdap.html)


එරබදු අපට නැති වුයේ ජාත්‍යන්තර කුමන්ත්‍රණයක් නිසා යැයි මා ඉහත කි කරුණට ඔබ දැන් මා සමඟ එකඟද? එසේ නම් එරබදු වැවීමේ මහා සටනක් අදින් පටන් ගන්න. මේ පණිවිඩය පතුරුවන්න. එරබදු වවා නිරෝගී පරපුරක් බිහි කරන්නට අත්වැල් බැඳ ගන්න. නැවතත්  මෙවැනි තොරතුරකින් යලි හමුවන තුරු ඔබේ දිවිය එරබදු මලින් පිරි ආයු බෝ වේවා!


රේණුකා විමලරත්න ලන්ඩනයේ සිට 30/04/2016

චායාරූප අන්තර්ජාලයෙන් (නම නොදත් ශිල්පීන්ට සම්පූර්ණ ගෞරවය හිමිවේ)















රේණුකාගේ පලා මල්ල 3 : අඟුණ කොළ

                      රේණුකාගේ පලා මල්ල 3

                             අඟුණ කොළ



අනුන්ගේ ගුණ අගුණ බලා ගන්නට නම් අද කාලයේ පහසුවෙන්ම පැමිණිය යුතු තැන මූණු පොතයි. කෙටියෙන් කිවොත් එදා ගමේ ගොඩේ හිටි අගිදලාගේ සොපියාගේ කාර්ය භාරය මූණු පොතට පැවරී තිබේ. තමන්ගේ ගුණ අනුන් ලවා කියවා ගැනීමේ අලුත්ම තාලේ වෙනස් ක්රමයක්ද අපේ සමාජයේ දැන් සැකසී ඇත. අරක්කු වීදුරුවක් සහ බත් පාර්සලයක් නොමිලේ දීමයි. කාලයත් සමඟ සමාජය උඩු යටිකුරු වී තිබේ. අගුණ කීමේ නම් සීමාවක් නැත.

දේශපාලනයේ වේවා, කලාවේ සංගීතයේ වේවා, වෙන ඕනෑම දෙයක මතු වී පෙනෙන්නේම අගුනය. ගුණයක් ඇති අයකුගේ වුව එය මතු කරන්නේ නැති තරම්ය. මා මේ සාකච්චා කරන්නට සූදානම් වන්නේ මේ සමාජ පෙරලිය පිළිබඳව නම් නොවෙයි. පලා මල්ලේ තිබී මට හසු වූ කෙතරම් ගුණ ඇතත් අගුණ යයි කියා සමාජයේ අසාධාරණයකට ලක් වූ අඟුණ කොල පිලිබදවයි මේ සටහන.


ලාංකික අපට බහුලව දකින්නට ලැබෙන අඟුණ වර්ග දෙවර්ගයකි. එකක් තිත්ත අගුණ වන අතර අනෙක කිරි අඟුණයි. මේ දෙවර්ගයේම ඇත්තේ එකිනෙකට ඉතා සමාන ගුණයි. කිරි අඟුණ කිවාත් රසය අතින් ගත් කල එහිත් යන්තම් තිත්ත රසයක් නැතිවාක්ම නොවෙයි.

 මේ කොයික වූවත් අලුත් පොල් සමඟ රතුලූනු දෙහි උම්බලකඩ දමා සම්බෝලය සාදා ගත් විට මට නම් රසවත් පලා වර්ගයකි. අත්තම්මා නම් නිතරම කිවේ මේ අඟුණ දෙවර්ගයම මැලවිමෙන් පසු එහි ඇති ගුණ විනාශ වන බවයිනමුත් අත්තම්මා ඉඳහිට කලවම් පලා සාදන දාට අඟුණ කොළ මිටක් එක්කරන්නට අමතක කළේද නැත.


 අඟුණ කොලේ වටිනාකම හුඟ දෙනාට මතක් වන්නේ දරු සම්පතක් ලැබුණු විටයි. අඟුණ කොලේ තිබු කිරි එරවිමේ හැකියාව නිසයි. දරුවෙකු ලැබෙන්නට සිටින මවකට හෝ කිරි දෙන අම්මා කෙනෙකුට බුදු පුදට සාදන්නා සේ ශ්රද්ධාවෙන් බත් පතක් සකස් කර දීමේ වටිනා පුරුද්දක් අපේ සමාජය තුල අදටත් පවතිනවා. එදා එවන් විටෙක මේ කිරි අඟුණ සම්බෝලය අත්තම්මා අතින් නොවරදුනේ එහි ඇති මේ විශ්ව කර්ම ගුණය නිසයි.
මේ අපූර්ව ඖෂධිය පලා වර්ගය පිළිබඳව විද්වතුන් කල සමීක්ෂණ අදටත් නැති තරමටම අඩුයි. මා ලියන මේ කරුණු බොහොමයක් අත්තම්මලාගෙන් සහ මගේ වැඩිහිටි කාන්තා නෑදයින්ගෙන් ගැන මට ඇසුණු දේ. ඔවුන්ට අනුව කිරි දෙන මවට අඟුණ කොළ ගුණ වන්නේ කොළ කෑවාට පසු උල්පතකින් ගලන්නා සේ කිරි එරෙන නිසාම පමණක් නොවෙයි.

අඟුණ කොළ වල ඉහල ප්රතිශතයකින් යකඩ, කැල්සියම් සහ වෙනත් විටමින් වර්ග අඩංගුයි. මේ යකඩ ශරීරයට අවශෝෂණය වීම අඩු නැතිවම සිදු වෙන්න අලුත් දෙහි ගෙඩියක් මිරිකලා තමා මැල්ලුම හෝ සම්බෝලය පිළියෙළ කෙරුනේ. ප්රසවයේදී සිදුවූ රුධිර වහනය නැවත ඉක්මනින්ම යතා තත්වයට ගෙන නිරක්තිය වලක්වන්නට මේ නිසා අඟුණ කොළ උපකාරී වෙනවා.

ඕනෑම පලා වර්ගයකට පොදු මල බද්ධය නැති කිරීමේ හැකියාව අඟුණ කොලයේත් තිබෙනවා. අපිරිසිඳු ජලය පානය කිරීමෙන් ඇතිවන අමිබා අතීසාරය සහ වෙනත්පරපෝෂිත ආසාධන වලට අගුණ කොළ මනා ප්රතිකාරයක්. නිසා තමයි අත්තම්මා අඟුණ කොළ හදා මොන විජ්ජුම්බරයක් කර හෝ වැලි මිදුලේ නටන කුඩා වුන්ට ගිල්ලවන්නට තනන්නේ. ඔවුන්ගේ පණු ගායට ප්රතිකාරයක් ලෙස.

තයිෆොයිඩ් උන වැනි උදරාබාධ වලදීත් වෙනත් බඩේ අජීර්ණ වලටත් අගුණ බොහෝ ගුණයි. ලස්සන වන්නට වලිකන තරුණ ගෑනු ළමයින්ටත් අඟුණ සුවදායි වන්නේ එහි ඇති කෙස් දිගු කර සම වර්ණවත් කිරීමේ හැකියාව නිසා.
අඟුණ කොළ වර්ග ගණනනාවක් ලොව පුරා විවිධ පළාත් වල පැතිරී තිබෙනවා. ඉන්දියාවේ කඳුකර ප්රදේශ ඇතුළු බොහෝ ආසියාතික රටවලත්, ඕස්ට්රේලියාවේ ඇතැම් ප්රදේශ වලත් අප්රිකාවෙත් අගුණ වර්ග දැක ගන්න පුළුවන්. අප්රිකාවේදී අගුණ භාවිතා කරන්නේ පිරිමි අයගේ ලිංගික හැකියාව වර්ධනය කර ගැනීමටත් ගැහැණුන්ගේ ලංගික හැඟීම් උත්තේජනය කිරිමටත්ලු . වැඩි පුර දරු සම්පත් ලබා දීමත් අප මෙන්ම වැදු මවට කිරි එරවිමටත් ඔවුන් අගුණ යොදා ගන්නවා. අයුර්වේදයේදී මෙය කලින් කීවාට සමාන හේතු සඳහා මෙන්ම බැක්ටීරියා වයිරස ආසාධන වලට ප්රතිකාරකයක් ලෙසත් යොදා ගැනෙනවා.

අප කුඩා කාලයේ නම් හැම ගෙවත්තකම වාගේ වැටට වෙන්නට මේ ඖෂධිය වැල යවා තිබුනා. වැටවල් වෙනුවට තාප්ප ඇතිවූ අසූවෙන් පසු කාලයේ මේ වැල් වර්ගය කෙමෙන් අපට නොපෙනී ගියා. අද නම් තියෙන තැනක් සොයා ගැනීමටත් බැරි තරම්. මූදෙන් එතෙර ඉන්න අපට නම් මේවා අතීතයේ දිව ගෑ රස සිහින පමණක්ම වෙලා.

අවාසනාවකට වාගේ රට තුල ජිවත් වෙන අපේ අම්මලා සුපර් මාකට් එකෙන් බ්රොකලි සොයා යන්න පුරුදු වෙලා. ගුණ පිරි අඟුණ පහසුවෙන් පෝච්චියක වවා උඩු මහලක වහල දිගේ හෝ යවන්නට හැකි ශාකයක්. මෙවන් ගුණ පිරි පලා වර්ගයක් ගෙවත්තේ වවන්නට සහ ඉඳහිට හෝ බත් පතට එක් කරන්නට අද පරපුරේ දෙනෙත් ඇරේවායි පතමින් අදට සමුගමි. නැවත හමුවන තුරු ඔබ සැමට ආයු බෝ වේවා!

රේණුකා විමලරත්න : ලන්ඩනයේ සිට
චායාරූප අන්තර්ජාලයෙන් (නිර්නාමික) සහ බණ්ඩාර වරකාගොඩ මහතා. (සියලු හිමිකම් ශිල්පින් සතුයි)