Monday, 27 March 2017

කළුකුම් මාළුව

                               රාජකීය රහසක් දැන ගනිමු..





අන්දරේ ගල උස්සන්න රජතුමාගෙන් ඉල්ලුවේ හීනටි සහල් බත් සමඟ කළුකුම් මාළුව ..බැඳුම්කරයකටත් වඩා වටිනා හීනටි හාල් ගැන  දේශීයසහල් විස්තරයෙන් අපි කතා කලානේ..
නමුත්  කළුකුම් මාළුව  ගැන නම් කවුරුත් දන්නා බවක් පෙනෙන්න නැහැ..සම්මතයක් හැටියට හැමෝම හිතාගෙන ඉන්නේ මේ කුකුල් මස් හෝ වෙනත් පාත්ත වර්ගයක මස් වර්ගයක් බව..

අද වගේ  නමට බෞද්ධ නොව සැබෑ බෞද්ධ සංස්කෘතියක් තිබුණු අතීතයේ මසට සතුන් මැරීම අපේ රටේ ප්‍රසිද්ධියේ සිදු වුන දෙයක් නොවේ.. 80 දශකය ආරම්භ වනතුරු මස් දකින්න ලැබුනේ නම් කලාතුරකින් මගුල් ගෙදරක පමණයි. දිනපතා ආහාරයට සාමාන්‍ය ගෙදරක මස් පිසීම සිදු වුනේ නැති තරම්..


ඕනෑ  තරම් මාළු, කරවල, ජාඩි වර්ග නැතත් රසයෙන් ගුණයෙන්  අනුන එළවලු ආහාර වේලක් සකස් කිරීමට කාලේ කාන්තාවන්ට තිබු දක්ෂකම නිසා  මස් මාංශ බතට පිසීම අවශ්‍ය වුනේම නැහැ..

පලාතෙන් පලාතට ඇති අපුරු භාෂාමය වෙනසත් සමහර විට කළුකුම් මාළුව මස් වර්ගයක් ලෙස පසුව හැඳින්වෙන්නට හේතු වෙන්නටත් පුළුවන්

කොළඹ රටේදී හැදෙන එළවලු කරිය, හොද්ද ..මතුගම පළාතේදී ව්‍යංජනේ   වෙලා නුවරට යද්දී මාළු වෙනවනේ..

මෙයැයිලගේ කුස්සි ගෙයි පිහාපු වතු මුවේ තන්මල්විල නැන්දම්මලාගේ ගෙදරදී පිඟානට බෙදුනේ මුව මස් වෙලා...

බුලත්සිංහල මාමණ්ඩිලගේ ගෙදර හදාපු කොල්ලු ව්‍යංජනේ අනුරාධපුරේ මහප්පලාගේ ගෙදරදී කද්දී ආනම වෙලා...

ආහාර වල නාමික හැඳින්වීම  පලාතෙන් පළාතට වෙනස් වෙන්නේ ඔන්න ඔය විධියට..



''චුටිට කන්න අද කළුකුම් මාළු තියෙනවා....''

රාලහාමි මාමලාගේ වත්ත මැද්දේ හොර පාරෙන් වෙල මැද්දෙන් ඉස්කෝලේ ඇරිලා ගෙදර එද්දී ඈතදීම මාව දකින අත්තම්මා එහෙම කියනවා.. වගේ දවස්වල මගේ බත් කන එනමල් පිඟානත්  අරගෙන රූන් ගාලා අත්තම්මලාගේ කුස්සියට දුවන්නේ  එක හුස්මට..නිතර නොලැබෙන කුකුල් මස් එහෙම නැත්නම් කවදාවත් රස බලා නැති පාත්ත  මස් කන්න හිතාගෙන ගියත් පිඟානට  බෙදෙන්නේ නම් වත්ත පහල ''පොළොස් වලට හොඳ'' යයි සම්මත කොස් ගහකින් නෙලා සකස් කල ''ගැට පොලොස්'' ව්‍යංජනයක්..

''කාපන් දරුවෝ මේක ඖෂධයක්..ගස් ගල් පෙරලන්න..විභාග පාස් වෙන්න ඕන ඔක්කොම බෙහෙත් මේ වෑන්ජනේ  තියෙනවා..''

පොලොස් ව්‍යංජනය එදා මෙන්ම අදටත් ජනප්‍රිය බවෙන් අඩුවක් නැති වුනත් බෙහෙතක් යයි කියමින් එදා අත්තම්මා පිසූ  තරම් රසවත් පොලොස් ව්‍යංජනයක් අදටත් මා නම් මේ  වනතුරු රස බලා නැහැ..

ඖෂධයක් වෙන්න පොලොස්  හදා ගත්තේ කොහොමද? අන් තැන්  වල නැති අපුරු රසයක් මේ පොලොස් ව්‍යංජනය ලැබුනේ කොහොමද? අද මා සුදානම් වෙන්නේ අන්න ''රාජ්‍ය රහස'' ඔබ සමඟ බෙදා ගැනීමටයි..

අත්තම්මාගේ පොළොස් ව්‍යංජන රෙසිපිය:

අවශ්‍ය ද්‍රව්‍ය

පොළොස් වලට සුදුසු ගසකින් නෙලා ගත් කොස් ගැටයක්

කොස් ගැටයේ ප්‍රමාණයට සෑහෙන්න රතුලූනු, සුදුලූනු, කරපිංචා, සේර, තක්කාලි , අමු මිරිස්

අමු තුනපහ: කරදමුංගු, කරාබු නැටි , සාදික්කා කුඩු, වසාවාසි , කුරුඳු, සුදුරු , මහදුරු, ගොරකා ගම්මිරිස්, උළුහාල්, මිරිස් කුඩු, කහ 

බැදපු  තුනපහ : සුදුරු, මහදුරු, කොත්තමල්ලි, අබ, ගම්මිරිස්, වියලි මිරිස් කරල් කීපයක්, සුදු හාල්, අමු පොල්, කරදමුංගු, කරාබුනැටි, වසාවාසි, කුරුඳු, කරපිංචා, රම්පෙ, සේර 

 මේ සියල්ල දුඹුරු පාට වනතුරු කබලේ බැද කොටා ගන්න

අවශ්‍ය පමණ රස අනුව මුහුදු ලුණු

පොල් ගෙඩි දෙකක පමණ මිටිකිරි


කැමති නම් උම්බලකඩ




තෙම්පරාදුවට:

රතුලූනු, සුදුළූණු, අමුමිරිස්, රම්පෙ,කරපිංචා, අබ, පොල්තෙල්




රාජ්‍ය රහස : අඟල් දෙකක පමණ සුදු සඳුන්  කැබැල්ලක්..

ඖෂධයක් වෙන්නේ කොහොමද?

අවශ්‍ය ද්‍රව්‍ය වෙන වෙනම ගෙන බැලුවොත් මේ සියල්ල දේශීය වෛද්‍ය ක්‍රමයේ සහ ආයුර්වේදයේ කියවෙන අප්‍රමාන ගුණ ඇති ඖෂධ


රතුලූනු, සුදුලූනු, කරපිංචා, සේරඅමු මිරිස්, උළුහාල්, සුදුරු, මහදුරු, කොත්තමල්ලි, අබ, ගම්මිරිස්,, අමු පොල්, කරදමුංගු, කරාබුනැටි, වසාවාසි, කුරුඳු, කරපිංචා, රම්පෙ, සේර, කහ යන සියල්ල ඖෂධ සඳහා ගැනෙනවා..

ප්‍රතිඔක්සිකාරක ගුණ , බැක්ටීරියා, වෛරස, දිලිර වැනි ක්ෂුද්‍රජීවී නාශක ගුණ, කොලෙස්ටරෝල් අඩු කිරීම, දියවැඩියාව නැසීම, පිළිකා දුරුලන, ආහාර මාර්ගය පිරිසිඳු කරන, ශරීරය ධුලකහරණය වැනි මෙකි නොකී ගුණ අඩංගු ඖෂධ එකතුවක් ලෙසත් අවශ්‍ය ද්‍රව්‍ය හඳුන්වන්න පුළුවන්.

කොස් ගැන නම් කවර කතාද..ජාතියේ මවුවරුන්ට මවුකිරි ගංගා එරවන කොස් ගෙඩියේ ගැට කාලෙනේ පොලොස් කියන්නේ..වැව් අමුණු බඳින්නට, සුද්දා ජාතිය විනාශ කරන්නට හදද්දී නැවත නැවත නැගිටින්නට ජාතිය පෝෂණය කල සුසතර වැදෑරුම්ව පිළයෙල කල  කොස්   අන්දරේට ගල ඔසවන්න ශක්තිය දීමට ඉදිරිපත් වුනා වෙන්නත් පුළුවන් නේද?

පොල්  කිරි ගැන වෙනත් කතා මොනවාදගොබෙල්ස් නියාමයට හසුව අපි පාම් තෙල් ගිලිද්දී  අද වන විට සුද්දා අපට හොරෙන් පොල්තෙල් පෙති බොනවා..මතක ශක්තිය පවත්වා ගන්න..ජිවිත කාලය දිගු කර ගැනීමට..පිළිකාවෙන්, හදවත් රෝග වලින් බේරෙන්න..සහ තව තවත් දේ වලට කියලා..

රාජ්‍ය රහස:



මේ තමයි කවුරුත් නොදන්නා පොලොස් ව්‍යංජනයට අත්තම්මා එකතු කරන සුදු සඳුන් කැබැල්ල..

සඳුන් ගැන ආයුර්වේදයේ කියවෙන්නේ දිව්‍ය ලෝකයෙන් රිෂි වරුන් මෙලොවට ගෙන ඖෂධයක් ලෙස. බෞද්ධ ඉතිහාසයේදී මහෝෂධ පඬිතුමා ඉපදෙන විට සඳුන් ගැටයක් අත ගෙන උපන් බවත් කියවෙනවා..

රූ  වඩන හෙළ රහස් ඖෂධ වට්ටෝරු තුල ඇති සඳුන් පෙම්වතා රවටා ගැනීමට මායා බන්ධනයක් ලෙස භාවිතා කල අපුරු ඖෂධයක් ලෙසත් කියවෙනවා. මානසික සුවය සලසන, මතකය වඩවන, සුවකිරීමේ ගුණ සහිත මේ දිව් ඖෂධය පුරාන හෙළ 

සුපවේදයේ විවිධාකාරයෙන් රස සහ ගුණ මතු කරන්නට යොදා ගත් බවයි අත්තම්මා කිවේ...


රජ වාසල අරක්කැමියෝ රජ බොජුන රසවත් කරන්නට යොදා ගත්  රහසිගත අමු ද්‍රව්‍යයක් වන සඳුන් අත්තම්මාගේ ආහාර වට්ටෝරු බොහොමයක තිබුනත් අතර පොලොස් ව්‍යංජනය තමයි  මුල් තැන 
ගත්තේ..


එයින් ව්‍යංජනය එකතුවෙන රස සහ ගුණ විඳීම මිස වචනයට විස්තර කිරීම අපහසුයි..

තුනපහ යොදා ගැනීමේදී අමු තුනපහ වගේම එකම දේ නැවත බැද කුඩුකර එක්කර ඇති බව ඔබට පෙනෙනවා ඇති..
මේ බොහොමයක් තුනපහ වර්ග වල නිසි ගුණ ආහාරයට එකතු වෙන්නේ ඒවා අමුවෙන් ආකාරයෙන්ම ආහාරයට එකතු කිරීමෙන් පමණයි..බැදපු තුනපහ නොහොත් කලුකුදඩු  වල රසය සහ සුවඳ මිස ගුණයක් ආහාරයට එකතු වෙන්නේ නැහැ.

කොත්තමල්ලි, සුදුරු , මහදුරු වැනි තුනපහ වර්ග කෙටීමෙන් ඝර්ෂණය නිසා යම් ප්රමාණයක ගුණ විනාශ වෙනවා.. වගේම අත් ගලේ හෝ වංගෙඩියේ කෙටීමට වඩා ගුණ හානියක් අධික තාපයක් ජනිත වීම හේතුවෙන් විදුලි මෝටරයෙන් කෙටිමේදී විනාශ වෙනවාකොටන ලද පහේ පැය 24-48ත් අතර ඒවායේ ඇති ගුණ සම්පුර්ණයෙන්ම පාහේ විනාශ වෙනවා..අත්තම්මලා පිසින්න පැය  කීපයකට අත්  ගලේ අඹරා ගත්  නිසාදෝ කාලේ අපට තුනපහ ගුණ සම්පුර්ණයෙන්ම ශරීරයට ලැබුනා..

පොලොස් ව්‍යංජනයේ අමුවෙන් මේ පහේ එක් කරන්නේ සම්පුර්ණ ගුණයම ලබා ගන්න. දේවල්ම බැද එකතු කරන්නේ සුවඳ සහ රස ලබා ගැනීමට..

සාදන ක්‍රමය:


පොලොස් ව්‍යංජන බොහෝ පලාත්වල පිළියෙළ කරන්නේ වතුරේ තම්බා ගැනීමෙන්පොලොස් ගෙඩියේ මවුකිරි වඩන, ශක්තිය සපයන සහ කහට වල ඇති ප්‍රතිඔක්සිකාරක, පිළිකා වලකනඑන්සයිමමය ගුණ මේ නිසා විනාශ වී ගොස් ශාකමය තන්තු ගොඩක් පමණයි ආහාරයට එකතු වෙන්නේ..

මේ තමයි අත්තම්මා පොලොස් ව්‍යංජන  පිළියෙළ කරගත් විධිය..

මුලින්ම මැටි හට්ටියකට උකු පොල්කිරි සාදා ගන්න..එයට කහ සහ ලුණු එකතු කරන්න.

දැන් පොලොස් ගෙඩිය දෙතුන් අතකට පලා කිරි (කොහොල්ලෑ) අපතේ නොයවා පොල්කිරි වලටම එකතු කරන්න. ඊළඟට හතරැස් කොටු ලෙස කපා ගන්නා පොලොස් කැබලි කිරි වලට එකතු කරන්න..



එයටම මුලින් සඳහන් කල අමු තුනපහ සහ රතුලූනු, සුදුලූනු, කරපිංචා, සේර, තක්කාලි , අමු මිරිස් එකතු කරන්න.


දැන් තෙම්පරාදුව සාදාගෙන එයත් පොලොස් මිශ්රණයට එක් කරන්න..බැදපු තුනපහ සහ අවශ් පමණට මිරිස් කුඩු එක්කර දර ලිපේ මද ගින්දරේ පැයක් පමණ පිසින්න..

ඊළඟට සඳුන් කැබැල්ල සහ උම්බලකඩ එක්කර තවත් පැය කීපයක් මද ගින්දරේ නිතර එහා මෙහා පෙරලමින් සෙමෙන් අඟුරු උඩ පිස ගන්න..

සාමාන්‍යයෙන් ආහාරයට/දානයට/කයිදම  ගැනෙන්නේ  රස සහ සුවඳ ඇල්ලීමට රැයක් තබා පසුදිනයි ..



ලිපිය සහ චායාරූප:

රේණුකා විමලරත්න : ලන්ඩනයේ සිට





5 comments: